Германиянинг жанубидаги Людвигсхафен шаҳрида BASF кимёвий заводига тегишли ҳудудда портламай қолган Иккинчи жаҳон уруши пайтидаги бомба зарарсизлантирилди, деб хабар бермоқда DPA агентлиги.

Компания ходимлари бомбани август бошидаёқ заводнинг жанубий қисмида тозалаш ишлари олиб бораётганларида аниқлашган.

Агентликнинг маълум қилишича, завод бомбани зарарсизлантириш давомида ўз ишини тўхтатмаган, бироқ ходимларга бомба аниқланган жойга 300 метрдан яқинроққа келмаслик тавсия этилган.

Компания вакили Сабрина ван дер Пуэттеннинг айтишича, бомбани зарарсизлантириш 3 соатдан кўпроқ вақт олди ва режа бўйича ўтди.

Германияда ҳар йили 5,5 мингга яқин портламай қолган ўқ-дорилар йўқ қилинади. Иккинчи жаҳон уруши пайтида Германияга ҳаммаси бўлиб 2 млн дан кўпроқ авиабомба ташланган, улардан тахминан 5 фоизи, яъни 100 мингга яқини портламай қолган.

Энг кўп миқдордаги бомбалар Берлин (68 минг тоннадан кўпроқ), Гамбург (45 минг тонна) ҳамда Рур вилоятига (162 минг тонна) ташланган.