Тожикистондаги исёнчи генерал Абдуҳалим Назарзода бошчилигидаги террорчилик гуруҳи тарафдорлари хориждан молиялаштирилган, деб маълум қилди Тожикистон давлат телевидениеси.

Тожикистон бош прокуратураси маълумотига кўра, тергов натижаларига кўра, генерал тарафдорлари хориждан молиялаштирилгани исбот қилинди. 

Бош прокуратуранинг маълум қилишича, Тожикистон мудофаа вазирининг собиқ ўринбосари Назарзода мамлакатда умумий сони 300 кишига яқинни ташкил қилган 10 тадан 30 тагача ҳукуматга қарши гуруҳ ташкил қилган. Бу гуруҳларга, шунингдек, мудофаа вазирлигининг баъзи зобитлари ҳам кирган.

Назарзода гуруҳи Тожикистонда бир нечта қўпорувчилик ҳаракатларини амалга оширгандан кейин 4 сентябрь эрталаб катта миқдордаги қурол-аслаҳа ва ўқ-дорилар билан Душанбедан 60 км узоқликда жойлашган Ромит дарасига беркиниб олган.  

Гуруҳга қарши шу куннинг ўзидаёқ бошланган операция 16 сентябрда якунланди. Операция давомида 139 нафар жангари ва уларнинг шериклари қўлга олинди, 28 нафари йўқ қилинди. Ҳуқуқ-тартибот муассасаларининг 14 нафар ходими ҳалок бўлди.

Тожикистон президенти Эмомали Раҳмон қуролли кучлар вакиллари билан учрашганда “террорчиларнинг йўлини тўсиб, мамлакатда барқарорсизликка йўл бермаган” аксилтеррорчилик операцияси иштирокчиларининг қаҳрамонлиги ва жасурлигини қайд қилиб ўтди.