Хитой ва АҚШ ўртасида терроризм ва пул ювиш жиноятларига қарши кураш бўйича меморандум имзоланди. Бу ҳақдаги маълумот Хитой ТИВ сайтига жойлаштирилган.

Маълум қилинишича, бу шартнома Хитой раҳбари Си Цзиньпиннинг АҚШга ташрифи давомида имзоланган.

"ХХР ва АҚШ "пул ювиш, терроризмни молиялаштириш ва шу турдаги бошқа жиноятлар" бўйича маълумотлар йиғиш ҳамда текширувлар олиб боришда ўзаро ҳамкорлик қилади", дейилади ҳужжатда.

"Томонлар терроризмга қарши курашда кўптомонлама ҳамкорлик қилишга киришади ва БМТ Хавфсизлик кенгаши қарорлари асосида ҳаракатланади", дейилади хабарда.

Шунингдек, АҚШ ва Хитой Афғонистонда тинчлик ўрнатиш масаласида ҳамкорлик қилиш борасида келишувга эришган.

Бундан ташқари, томонлар порахўрликда айбланган шахсларга тегишли мулкларнинг ҳибсга олинишида ўзаро ҳамкорлик қилади. Қолаверса, ноқонуний муҳожирлар ва қочқинлар масаласида томонлар ўзларига юклатилган мажбуриятларни бажаришлари белгилаб қўйилган.

Қайд этиш керакки, бунгача Хитойдан АҚШга ўтиб кетган жиноятчи амалдорларни ортга қайтариш бўйича келишув йўқ эди.

Хитойда жорий йил аввалида эълон қилинган "тулки ови" амалиётлари давом эттирилмоқда. Бу тадбир мамлакатда молиявий жиноятлар содир этиб, хорижга чиқиб кетган шахсларни ортга қайтаришни назарда тутади. Бундай жиноятчиларнинг аксарият қисми АҚШ ва Канададан бошпана топган. Маълумотларга кўра, бундай жиноятчи амалдорлар Хитойга шу вақтгача камида 50 миллиард доллар зарар етказган.