24 сентябрь куни Макка шаҳрида ҳаж зиёрати амалга оширилиши чоғида тиқилинч юзага келиши натижасида ҳалок бўлган 700дан ошиқ кишидан 29 нафари ҳиндистонлик бўлган. Бу ҳақда Ҳиндистон Ташқи ишлар вазири Сушму Свараж ўзининг твиттери орқали маълум қилган.

Бундан олдинги маълумотларда ушбу фожиа туфайли 14 нафар ҳиндистонлик ҳалок бўлгани айтилганди.

"Афсуски, Маккадаги тиқилинч вақтида ҳалок бўлганлар сони ошди ва ҳозирда бу миқдор 29 нафарни ташкил этади", деб ёзади вазир.

Ҳиндистон элчихонаси ходимлари марҳумларнинг оила аъзоларига ёрдам кўрсатиши айтилган.

Эслатиб ўтамиз, фожиа 24 сентябрь куни эрта тонгда Макка яқинидаги Мино водийсида содир бўлди. Иккита улкан одамлар оқими чодирлар шаҳарчасидан шайтонга тош отиш амали бажариладиган ҳудудга элтадиган йўлдаги чорраҳада тўқнаш келиб қолган. Кўчалар кесишмасида улкан тиқилинч вужудга келиб, натижада 769 киши ҳалок бўлди, энг камида 934 зиёратчи жароҳатланди.