Ўзбекистон Республикаси Президенти томонидан 2015 йил 18 февраль куни тасдиқланган «Кексаларни эъзозлаш йили» Давлат дастурида кекса ёшида фан, маданият ва санъатда катта натижаларга эришган, буюк илмий, адабий, мусиқали асарлар ва бошқа маданий қадриятлар яратган ватандошларимиз ҳаёти ва фаолияти ҳақидаги «Умрбоқий сиймолар» ҳужжатли фильмлари туркумини яратиш белгилаб қўйилган.

Давлат дастури ижросини таъминлаш мақсадида, «Ўзбеккино» Миллий агентлиги буюртмасига биноан таниқли навоийшунос олим, академик Азиз Қаюмов, филология фанлари доктори, профессор Наим Каримов ва Ўзбекистон халқ рассоми, академик, таниқли ёғоч ўймакор уста Ортиқ Файзуллаевнинг ҳаёти, ижодий фаолияти ва бой илмий-маданий мероси ҳақида ҳикоя қилувчи «Адабиёт сарманзиллари», «Дониш дарахти» ва «Уста» номли ҳужжатли фильмлар суратга олинди.

Ўқитувчи ва мураббийлар куни арафасида, жорий йилнинг 29 сентябрь куни соат 15:00да «Киночилар уйи»да мазкур фильмларнинг тақдимоти ҳамда фильм қаҳрамонлари билан ижодий учрашув – «Эъзоз ва эҳтиром кечаси»ни ўтказиш режалаштирилган. Унда фильмларнинг асосий қаҳрамонлари, уларнинг шогирдлари, ҳамкасблари ҳамда кўплаб таниқли олиму ижодкорларнинг иштирок этиши кўзда тутилган. Бу ҳақда «Ўзбеккино» Миллий агентлиги матбуот хизмати хабар қилган.

Тадбирни ёритишни истаган оммавий ахборот воситалари вакиллари мазкур тадбирга таклиф этилади. Қўшимча маълумотлар учун Агентлик матбуот хизматига мурожаат қилиш мумкин.