Беларусь президенти Александр Лукашенко франциялик таниқли актёр Жерар Депардье иштирокидаги «Нормандия — Неман» фильмини суратга олиш ишлари учун 2 миллион доллар ажратди. Бу ҳақда Госфильмофонд бош директори Николай Бородачев "Известия" нашрига маълум қилган.

Бу Франция, Россия ва Беларусь киноижодкорлари ҳамкорлигида амалга ошириладиган энг катта лойиҳа бўлиши айтилмоқда.

Бородачевнинг айтишича, айни вақтда фильм продюсерлари ташкилий масалаларни ҳал қилишмоқда. Ушбу фильмда Депардье иккинчи пландаги актёр сифатида иштирок этади. У ушбу фильмда механик қаҳрамонни гавдалантиради.

Депардье ушбу картина ҳақида шу йилнинг июнь ойида Беларусга ташриф буюрган вақтида гапириб ўтганди. У ушбу фильм генерал Шарль де Голлнинг ҳаётида юз берган воқеалар асосида суратга олиниши ҳақида маълумот берганди. Фильмнинг катта саҳналарга қачон чиқарилиши маълум эмас. Депардье ўшанда Беларусга фақат ишлаш учун келмагани, бу ерда яшашни исташини маълум қилганди.

Маълумот учун, «Нормандия — Неман» Франциянинг Иккинчи жаҳон уруши давридаги авиацион полки бўлиб, у 1942 йилда генерал Шарль де Голл ташаббуси билан ташкил этилган.

«Нормандия — Неман» учувчилари уруш давомида 5 мингдан ортиқ ҳарбий парвозларни амалга оширишган ва 900дан ортиқ жангларда иштирок этишган.

1960 йилда ҳам ушбу полк ҳақидаги ҳужжатли фильм экранлаштирилган, унга франциялик Жан Древиль режиссёрлик қилганди. Ўша картинада ҳам бир қатор рус актёрлари Николай Лебедев, Юрий Медведев, Владимир Гусев, Николай Рыбников, Виталий Доронин ва Нина Гребешкова иштирок этишганди.