БМТ Бош Ассамблеясида чиқиши чоғида АҚШ президенти Барак Обама Россияни халқаро масалаларни дипломатик йўл билан ҳал этишга чақирди. У Донбассдаги инқироз масалалари ҳал бўлмагунча Россияга қўйилган санкцияни узайтиришни таклиф этди.

Қрим ва Украина масалалари дипломатик йўл билан ҳал бўлмаганига афсусланган Барак Обама Россияга санкция эълон қилишга мажбур бўлганини таъкидлаб ўтди. Обаманинг сўзларига қараганда, санкция Россияни миллий валютасини кучсизланишига ва янги иқтисодий инқироз содир бўлишига сабаб бўлди.

“Биз Россияни қуршовга олмоқчи эмасмиз. Бизга дунё хавфсизлигини таъминлай оладиган ва биз билан ишлайдиган кучли Россия керак”, деб қўшимча қилди Обама.

АҚШ президенти ўз чиқиши чоғида яна шуни таъкидладики, у ҳозир ҳам аввалгидек масалани дипломатик йўл билан ҳал этиш тарафдори.

Шунингдек, Обама бу масала дипломатик йўл билан ҳал бўлмаса, ўз манфаатларини куч билан ҳал этишга АҚШнинг қурби етишини айтиб ўтган.