Қирғизистоннинг Ўш вилояти Араван туманида истиқомат қилувчи 15 ёшли бола яшайдиган уй томорқасидан 5 ёшли боланинг жасади аниқланган. Унинг ўлимидан гумондор сифатида 9-синф ўқувчиси қўлга олинган. Бу ҳақда вилоят ички ишлар бўлими бош бошқармаси матбуот котиби Женишбек Аширбаев хабар берган.

Унинг маълум қилишича, марҳум болакай Баходиржон Олимовнинг ота-онаси у йўқолиб қолгани ҳақида милицияга мурожаат қилишгач, жиноий иш очилган ва тезкор қидирув ҳаракатлари бошланган.

"Болакайнинг жасади қўшнилардан бирининг маккапоясидан топилди. Унинг қўл ва оёқлари скотч билан боғланган эди. Бу эса болакайнинг зўравонлик билан ўлдирилганини исботлайди", дейилади ИИВ хабарида.

Қотилликни содир этганликда асосий гумондор қўлга олинган ва тергов давомида ўз қилмишига иқрор бўлган.

Қотилликни содир этган ўсмирнинг айтишича, 22 сентябрь куни кеч соат 18.00лар чамасида унинг сигарет чекаётганини кўрган қўшни болакай, унинг сигарет чекишини ота-онасига айтишидан огоҳлантирган. Шундан сўнг, ўсмир болакайни қўрқитиш учун уйидан скотч олиб чиқиб, уни алдаб далага олиб борган. Қўллари ва оёқларини скотчлаётганда, болакай қичқирган. Шунда ўсмир унинг оғзидан бўйнигача скотчлаб, далага ташлаб кетган. Бола нафас ололмасдан ҳалок бўлган.

Унинг жанозаси Қурбон ҳайити намози вақтида ўқилган.

Айни вақтда қотиллик содир этган ўсмир ҳибсда сақланмоқда. Милиция ходимлари икки қўшни томон орасида қасд олиш ҳаракатлари бошланмаслиги учун доимий назоратда бўлиб туришибди. 

Ваҳшийларча ўлдирилган 5 ёшли боланинг жасади тасвирланган суратлар ижтимоий тармоқлар бўйлаб тарқалмоқда.