Тошкентда абитуриентларни ўқишга жойлаштириб қўйиш баҳонасида одамларни алдаб пулини олиб юрган фирибгарлар Носир Жўрабоев ва Низом Алимовлар қўлга олинди. Бу ҳақда “Даракчи” газетаси ёзмоқда.
Айтилишича, Жўрабоев ўзини олий ўқув юрти ўқитувчиси, Алимов эса ҳокимият ходими сифатида таништириб, шу йўл билан “мижоз овлаб” келганлар. Аслида эса уларнинг иккиси ҳам ишсиз бўлган.
Ёз кунларида улар кўплаб одамлардан пул олиб, сўнг телефонларини ўчириб, кўздан ғойиб бўлишга интилишган.
Имтиҳонлар ўтиб бўлгач, бир куни Нигора исмли қиз Жўрабоевга мурожаат қилиб, ўқишга кира олмаганини тушунтирган ва қўшимча ўрин гаплашиб беришни сўраган. Бунинг эвазига Жўрабоев ундан 8 минг доллар сўраган. Аммо Нигора унинг фирибгарлигини пайқаб қолиб, тегишли органларга мурожаат қилган. Натижада Жўрабоев ва Алимовлар 8 минг доллар олаётганида жиноят устида қўлга олинган.