28 сентябрь тонгида Евросиёнинг ғарбий қисми, Шимолий Африка ва иккала Америка шарқий қирғоқлари аҳолиси қип-қизил ёки жигаррангдаги улкан Ойни кузатди. Фотограф Tom Clancy Тошкент вилояти, Сўқоқ қишлоғидан Ойнинг жигарранг тусга киришини суратга олишга муваффақ бўлди, деб хабар берди "Daryo.uz".

Фотограф Ойни Тошкент вақти билан соат 05:00 дан 06:10гача кузатди.

«Тўлиқ Ой тутилиши бошланмасдан туриб, якунига етди. Қисман тутилиш Тошкент вақти билан тахминан 05:30да бошланди. Ой гардиши тезда жигарранг тусга кирди ва 40 дақиқадан сўнг уфқ ортига яширинди», — дейди фотограф.

Аммо Tom Clancy Ойнинг жигарранг тусга кириши унинг тутилганини англатмаслигини айтиб ўтди.

«Ҳар сафар Ойнинг кўриниб турган вақти қуёш чиқишига тўғри келиб қолса, у жигарранг ёки қизил рангда бўлади», — дейди Tom Clancy.

Астрономларнинг ҳисоб-китобларига кўра, Ойнинг қисман тутилиши Тошкент вақти билан соат 06:07дан бошланган. Тўлиқ ой тутилиши эса 7:10дан 8:23гача давом этган. Бироқ тўлиқ ой тутилиши Ўзбекистон ҳудудидан кўринмаган.

Шунингдек, твиттер фойдаланувчилари дунёнинг турли бурчакларида олган қизил Ой суратларидан репортаж уюштирилди.