Ҳиндистон разведкаси Нью-Деҳли ва Ражастон полициясини “ИШИД” террорчилик гуруҳи мамлакат ҳудудида терактлар амалга оширишга тайёрланаётганидан огоҳлантирди, деб 29 сентябрда хабар берди ўз манбаларига иқтибос келтирган ҳолда Times of India газетаси.

“ИШИД” амалга ошириши мумкин бўлган ҳужумлар куз мавсумида, Ҳиндистонда бир қатор индуизм байрамлари, жумладан олов байрами Дивали нишонланиши пайтида амалга оширилиши режалаштирилмоқда.

Нашр манбаларининг маълумотларига кўра, “ИШИД” ижтимоий тармоқ орқали охирги бир неча ой давомида 40 га яқин ёшларни ўз домига торта олган.

IANS агентлигининг хабар беришича, “ИШИД” Ҳиндистоннинг шимоли-шарқий штати Ассамда фаоллашган.

Сентябрь бошида БААда “ИШИД”га қўшилмоқчи бўлган 11 нафар ҳинддан иборат гуруҳ кўлга олинганди. Times of India маълумотларига кўра, айни пайтда “ИШИД” сафида 17 нафар ҳинд жанг қилмоқда.