Ўзбекистонда илк бора уйсиз ит ва мушуклар учун бошпана қуриб берилади. У ҳашар йўли билан қад ростлаши кутилмоқда. Уни нодавлат нотижорат ташкилот ҳисобланмиш “Уйсиз жониворларни қутқариш ташкилоти” қуриб беради. Ушбу ташкилот 2014 йилда очилган. Ташкилот фаоллари уйсиз қолган ит ва мушукларни уй билан таъминлашга, уларни саломатликлари ва тозаликларидан бохабар бўлишга ҳаракат қилишади.

Буларнинг бари шахсий маблағлар ва меҳрибон инсонлар ёрдами эвазига амалга ошади.
Ўз уйларини топган итлар: олдинги ва ҳозирги суратлар. Ташкилот архивидан.

Ташкилот фаоллари бир неча йилдан бери уйсиз ит ва мушукларга бошпана қуришни режалаштириб келишаётганди. Ва ниҳоят ташкилот уч гектар ерни қўлга киритишга муваффақ бўлди. У Қибрай туманида жойлашган. Ҳозирча у ерда ҳеч нарса йўқ: на қурилиш, на электр қуввати ва на сув.

— Ҳукумат бизга бу ерни мутлақо бепулга ажратди. Биз бунинг учун улардан миннатдормиз, — деди ташкилот асосчиси Оксана Капырина.

– Бу  жамият уйсиз жониворларга меҳр кўзи билан қараётганини исботлайди.

Биринчи ҳашарга ўнга яқин одам йиғилди. Ҳашарчилар кунлар совуқ бўлиши билан ҳафтанинг ҳар якшанбасида йиғилишни келишиб олишди. Ташкилотнинг айтишича, бу ишни ташкиллаштиришга янада кўп қўллар ва моддий ёрдам керак. Ташкилот аъзолари билан Фейсбук ижтимоий тармоғидаги “Барчаси ўз қўлингда” («Все в твоих руках») саҳифаси орқали боғланиш мумкин.