Ўзбекистон Республикаси Фанлар академияси Мирзо Улуғбек номидаги Астрономия институти Хитой фанлар академиясига қарашли Миллий астрономия обсерваториялари билан Майданакдаги телескопни модернизациялаш ишларини бошлаб юборди.

Кўзгусининг диаметри 1 метр бўлган ушбу телескоп ёрдамида 2016 йилдан Майданак юлдузлар каталогини тузиш ишлари бошланади. Каталог 150 миллион юлдузни ўз ичига олади.
Бу ҳақда Миллий матбуот марказида бўлиб ўтган “Астрономия фани истиқлол йилларида” деб номланган матбуот анжуманида маълум қилинди.

Ўзбекистон ахборот агентлигининг хабарига кўра, ҳозирда Майданак обсерваториясининг Япония Миллий астрономия обсерваторияси, Жанубий Корея университетлари ассоциацияси, Германия, Франция обсерваториялари тадқиқотчилари билан биргаликдаги илмий изланишлари янада кенгайган.

Халқаро алоқаларни ривожлантириш натижасида Майданак расадхонаси астроиқлими билан бирга замонавий асбоб-ускуналар билан жиҳозланганлиги бўйича ҳам жаҳондаги энг нуфузли обсерваториялар сафидан ўрин олган.

Институт олимларининг изланишлари самарасида Самарқанд кичик сайёраси, шунингдек, бир қатор сайёралар кашф этилди.

Институт кўмаги билан мамлакатимизнинг олий ўқув юртларида олтита ўқув обсерваторияси ишга туширилди.