Honda компанияси водород ва кислород ўртасидаги кимёвий реакция натижасида энергия ишлаб чиқарувчи ёниғли катакчаларидан қувват оладиган электр двигатель билан таъминланган FCV хэтчбек моделининг расмий тасвирларини илк маротаба эълон қилди. Мазкур янги автомобиль намойиши октябрь-ноябрь ойларида Токиодаги автосалонда бўлиб ўтади.

Honda вакилларининг қайд этишларича, “юқори қувватли двигателлар” билан таъминланган FCV модели захираси 700 километр масофани босиб ўтишга етади. Япон автомобиль ишлаб чиқарувчиси машинасига фавқулодда вазиятларда бинони электр токи билан таъминловчи қурилма ҳам жойлаштирилган.

FCVнинг ҳаракат имкониятлари ва двигателининг қуввати ҳақидаги маълумотлар ҳозирча ошкор қилингани йўқ. Шунингдек, японлар FCV моделнинг якуний номи эмаслигини ҳам айтиб ўтишди.

Honda FCV автомобилига энг яқин модел FCEV прототипи бўлиб, у 2013 йил ноябрь ойида АҚШнинг Лос-Анджелес шаҳрида бўлиб ўтган моторшоуда намойиш қилинган эди. Унинг захираси 386 километрлик йўлни босиб ўтишга етарли. Орадан бир йил ўтиб японлар бир марталик захира билан 482 км масофагача ҳаракатланувчи концепт-карнинг FCV деб номланган яхшиланган намунасини намойиш этди.