Ироқда 2 сентябрь куни ўғирлаб кетилган туркиялик ишчилар 30 сентябрда озодликка чиқарилди. Туркиянинг NTV телеканали тарқатган хабарга кўра, бу ҳақда журналистларга ҳозирги вақтда Нью-Йоркдаги БМТ Бош Ассамблеяси йиғилишида иштирок этаётган мамлакат бош вазири Аҳмад Довутўғли маълум қилди.

Унинг сўзларига кўра, Туркия фуқаролари Басра шаҳрида озодликка чиқарилган ва айни пайтда Туркия элчиси ҳамроҳлигида Бағдод шаҳрига йўл олган. Довутўғлининг таъкидлашича, у телефон орқали икки ишчи билан суҳбатлашишга улгурган.

Эслатиб ўтамиз, 2 сентябрь куни ниқобланган, ҳарбий либосдаги номаълум шахслар Ироқ пойтахтининг шарқий қисмида жойлашган Мадинат- эс-Садр туманида барпо этилаётган олимпия спорт мажмуасининг қурилиш майдонига бостириб кириб, 18 нафар турк – 14 ишчи, уч муҳандис ва бир ҳисобчини номаълум томонга олиб кетган эди. Икки Туркия фуқароси 16 сентябрда қўйиб юборилган.