Фарғона вилоятининг Риштон туманида истиқомат қилувчи 32 ёшли Иномиддин Т. маст ҳолатда 1982 йил туғилган Алишер А. га бошқарувидаги “Нексия” русумли автомобилни тўхтатиб, маълум жойга олиб боришни илтимос қилади. Ҳеч нарсадан шубҳаланмаган Алишер йўловчини сўраган манзилига етказиб қўйишга қарор қилади.

“На посту” нашрининг хабар қилишича, йўлда Иномиддиннинг нияти айниб, машинани тўхтатишни талаб қилади. Шундан сўнг ҳайдовчига пичоқ ўқталиб, уни автомобилдан тушириб юборади ва машинани ўзи ҳайдаб кетади. Бироқ кўп юрмасдан автомобиль ўғриси бошқарувни йўқотиб, уни фермер хўжаликларидан бирининг деворига бориб уради. Талончи машина салонини титкилаб, автомобиль ғаладонида сақланаётган ҳайдовчига тегишли 350 минг сўм пул ва “Нокиа” русумли мобиль телефонини олиб, ўз йўлида давом этади.

Жиноий ҳаракатларини тамомламаган Иномиддин “Дамас” русумли машинани тўхтатади ва юқоридаги сценарий асосида ҳайдовчи Давлат Ж. дан туман марказига элтиб қўйишни илтимос қилади. Манзилга етганидан сўнг ҳамёнидан пичоғини чиқариб, Давлатнинг ёнида бўлган 116 минг сўм пулни зўрлик билан олиб қўяди.

Жабрланганлар аризасига биноан олиб борилган тезкор тадбирлар натижасида жиноятчи қўлга олинди.