Чеченистон раҳбари Рамзан Қодиров Сурияда ўрнашган ИШИД жангариларига қарши ҳарбий ҳаракатларда иштирок этиш учун бу мамлакатга боришга тайёрлиги ҳақида маълум қилди.

"Агар Россия Федерацияси Ҳарбий қўшинлари олий қўмондони Владимир Путин буйруқ берса, биз эртагаёқ Сурияга йўл олишимиз мумкин. Бизда юқори тайёргарликка эга махсус ҳарбий хизматчилар бор ва бундайлар Ғарбда йўқ. Бизнинг аскарларда тажриба ва билим бор", дея ёзади у ўзининг ижтимоий тармоқлардаги саҳифаларида.

Россия Федерацияси кенгаши Путинга хорижда ҳарбий амалиётларга ўтказишга рухсат берганидан кейин Қодиров бу воқеани қизғин равишда қўллаб-қувватлаган.

"Мен РФ президенти Владимир Путиннинг Сурияда ҳарбий амалиётлар ўтказиш бўйича қабул қилган қарорини тўла равишда қўллаб-қувватлайман. Мен Суриядаги ёвуз жангарилар ўз инларида йўқ қилиниши тарафдориман", дея қайд этади Қодиров.

У Россия бу борада мусулмон давлатлари томонидан кенг равишда мадад олишига ишонч билдириб ўтган.

"Россия халқаро нормалар асосида ҳаракат қилмоқда. Сурия президенти Россия президентидан ёрдам сўради. Биз уларга ёрдам бера оламиз. Америка, Австралия, Франция ва бошқа мамлакатлар эса ўзларини Сурияда қароқчилар каби тутишмоқда. Сурияга эса ҳақиқий иттифоқчи керак", дейди у.

У Грозний шаҳрида ўтказилган матбуот анжумани вақтида Сурияда қуруқликдаги ҳарбий ҳаракатлар бошлангудек бўлса, Чеченистондан бир неча минг аскар бу жангларда қатнашишга тайёр эканини маълум қилган.

"Афсуски, чеченлар бу шайтон малайларига қарши жанг олиб бориш учун рухсатга эга эмас. Агар Россия Сурияга қуруқлик қўшинларини киритадиган бўлса, биз биринчи сафда бўламиз", дейди Қодиров.