Католик черкови раҳбари, Рим папаси Франциск ўзининг биринчи мусиқали альбомини чиқаришга тайёргарлик кўрмоқда. Папа бу альбоми ёрдамида диндорлар орасида умид, муҳаббат ва ишончни улашишга умид билдирмоқда, деб ёзмоқда The Rolling Stone нашри.

"Wake Up!" (“Уйғон”) деб номланган альбом 27 ноябрда савдога чиқади ва Рим папасининг энг яхши даъватларидан парчаларга эга поп-рок услубидаги треклардан иборат бўлади. Альбомдан ўрин олган "Wake Up! Go! Go! Forward!" (“Уйғон! Олға! Олға! Олдинга!”) деб номланган биринчи сингл яқинда интернетда пайдо бўлди.

Альбом Ватикан томонидан маъқулланди. Пластинкадан понтификнинг даъватлари ва турли тиллардаги энг илҳомлантирувчи нутқларидан парчалардан иборат композициялар ўрин олади. Папанинг сўзлари поп-рок мусиқа ҳамроҳлигида янграйди.

Нашрнинг маълумотларига кўра, ҳозирда альбомга iTunes хизмати орқали буюртма берса бўлади. Рим папаси ўз тингловчиларига италян, инглиз, испан ва португал тилларида мурожаат қилади. Пластинка дунё муаммолари, бурч, экология ва муҳтожларга кўмак кўрсатишга бағишланган 11 та композиядан ташкил топади.