Голливуд актёри Дэниел Крэйг The Daily Mail нашрига берган интервьюсида ўз жисмоний имкониятлари имкон берган вақтгача Жеймс Бонд ролини ижро этишда давом этишини маълум қилган.

Бондни ўйнаш катта жисмоний зўриқишларни талаб этади. Мен кинони тасвирга олиш жараёнида доимий равишда спорт залларида тер тўкаман. Мен эндиликда ёш эмасман ва бу ролни ижро этишим қийинлашиб бормоқда. Лекин танамда кучим бор экан, бу ролни ижро этишда давом этаман", дейди актёр.

Фильм ижодкорлари Дэниел Крейг билан "007: Спектр" фильмини суратга олиш ишлари якунланганидан кейин ҳам у билан яна камида битта фильмда ҳамкорлик қилиш бўйича битим тузиб бўлишган. Актёрнинг ўзи келажакда Бонд ҳақидаги яна нечта фильмда суратга тушишини аниқ айта олмаслигини билдирган.

Бундан ташқари, актёр ўз интервьюсида ўзини Бонд билан қиёсламаслик кераклигини таъкидлаган.

"Мен ҳақиқий ҳаётда енгилмас ва хотинбоз эмасман. Мен ўз қаҳрамонимдан таъсирланмаганман. Ҳақиқий ҳаётда мулойим ва одобли йигитман. Актёрларни персонажлар билан қиёслаш тўғри бўлмайди", дейди у.

"007: Спектр" фильми шу йилнинг 6 ноябрь куни кинопрокатга чиқарилади. Бу картина Крейг учун Бонд ҳақидаги фильмларнинг тўртинчиси бўлди.

Қайд этиш керакки, Крейг ижросидаги Бонд ҳақидаги фильмларнинг энг кўп даражада муваффақиятга эришгани «007: «Скайфолл» координатлари» номлиси бўлди. Бу картина кинопрокатларда 1,1 миллиард доллар маблағ ишлаган.