Ўз самолётлари орқали Сурия ҳудудини бомбардимон қилганидан кейин Россиянинг Яқин Шарқдаги таъсири кенгайди. Бу ҳақда Business Insider порталида ёзилган.

Ҳарбий мавзулар бўйича таҳлилчи Жефф Уайтнинг билдиришича, АҚШдан фарқли равишда Россия бу ҳудудда ўз таъсирини кенгайтириш учун катта қадамлар ташлади.

"Руслар тўғри ҳаракатланишмоқда. Уларнинг ўз режаси бор ва улар шу режа бўйича иш тутишмоқда. Улар АҚШнинг ожизлигидан фойдаланишди ва АҚШни курашга даъват этди. Россиянинг ўз мақсадлари графиги бор. Улар нима хоҳлашларини ва нима қилаётганларини яхши билишади", дейди Уайт.

Унинг фикрича, айни вазиятда АҚШнинг устунлик учун имкониятлари ҳаминқадар.

"Бирон нарса қилиш учун жуда кеч бўлди. Биз Россиянинг ҳаракатларига жавоб бермадик. Энди биз улар билан фақат қувлашмачоқ ўйнашимиз мумкин", дейди таҳлилчи.

У АҚШ томонидан Россияга кескин жавоб берилиши керак, деб ҳисоблайди. Унинг фикрига кўра, АҚШ Россия Сурия осмонидан ўз самолётларини олиб кетишини талаб қилиши керак.

Яқин Шарқ бўйича сиёсий таҳлилчи Жонатан Шанцер эса Россия томонидан Сурияда амалга оширилаётган ҳаво зарбалари ҳудуддаги вазиятни мураккаблаштириб, хаосни пайдо қилишидан огоҳлантирган.

"Россия самолётлари Сурия осмонида кезиб юрар экан мустабид Башар Асад ўзини бехавотир ҳис этади. Асаддан норози томонлар Владимир Путиннинг ўйинни қандай олиб боришини кутиш ва кузатишдан бошқа чораси қолмаяпти", дейди Шанцер.