Япониялик молиячи, айни кунларда Қозоғистонда ишлаётган Кацуя Ишизаки ўзи учун янги бўлган мамлакат ушбу мамлакатдан олган таассуротларини Nur.kz сайти билан ўртоқлашди.

“Олма-Отага мен ўтган йилнинг декабрида келган эдим, - деди у. – Илгари мен 10 ой Россияда яшаган эдим. Мени Қозоғистонга юборишганида норози эдим. Россияга анча ўрганиб қолган эдим, рус тилини тушуна бошлаган эдим. Аммо ҳозир Қозоғистон яхшироқ деб ўйлаяпман, негаки бу ерда одамлар жуда меҳмондўст”.
Олма-Отанинг табиатини мақташ билан бирга, меҳмон шаҳарнинг қиши япониялик учун совуқлик қилишини, йўллардаги тирбандлик эса Японияда деярли кузатилмаслигини қайд қилди.

Шаҳарнинг асосий камчиликлари сифатида эса киракашларнинг бетгачопарлиги ва ҳеч қачон вақтида етиб келмаслигини айтиб ўтди.
“Такси ҳеч қачон вақтида келмайди, - дейди Ишизаки. – Ҳозир мен уларни бироз ўргатиб олдим, улар олдиндан етиб келадиган бўлган. Ишда ҳам шу аҳвол. Мен ўз ишимни вақтида бажаришга улгурмайман, негаки бошқалар шошилмайди. Мен бошлиқ эмасман, шу боис баъзан ахборот сўрасам, уни олиш жараёни жуда чўзилиб кетади”.

Унинг таъкидлашича, Японияда бой инсонлар улуши камроқ, аммо аҳоли, умуман олганда, яхшироқ турмуш даражасига эга. Шу боис у қозоғистонликлар кредитга ўтказадиган тўйлардан ҳайратда қолди: “Кредитлар бизда икки фоизлик. Улар одатда уй сотиб олишга берилади. Машина олмоқчи бўлган одам пул тўплаши лозим. Кредитга тўй ўтказишнинг эса имкони йўқ. Агар йигит тўйга кредит олса, қиз унга тегишдан бош тортиши мумкин. Тўйларимиз кичкина, уларда 80-100 киши бўлади”.