Қозоғистон Ташқи ишлар вазири Ерлан Идрисов Суриядаги ижтимоий фожиани “дунёдаги энг жиддий инқирозлардан бири” деб атади. Мамлакат ташқи ишлар бош идораси раҳбари Қозоғистон Республикасининг бу борадаги позициясини БМТ Хавфсизлик кенгашидаги очиқ дебатларда иштирок этиш асносида маълум қилиб ўтди.

Вазирнинг қайд этишича, Қозоғистон музокара ва тинчлик йўли билан Сурия сиёсий келажагини белгилаш, мамлакатдаги зўравонлик ва қон тўкилишларга барҳам беришда халқаро ҳамжамият – БМТ, Араб давлатлари лигаси, АҚШ ва Россия Федерацияси кўрадиган чора-тадбирлар, шунингдек, Сурия ҳукумати ва мухолифат хатти-ҳаракатларини қўллаб-қувватлайди.

"Қозоғистон Сурия инқирозини фақатгина тинч йўллар билан ҳал этиш позициясида собит қолади”, - деди Идрисов.

Қозоғистонлик вазир мамлакат ҳукуматининг глобал чақириқларни ҳал этишда ўз амалий ҳиссасини қўшишга тайёр эканини ҳам маълум қилди.