Атмосферага иссиқхона газларини ажратиб чиқариш улуши 85 фоизни ташкил этувчи 147та мамлакат улар ҳажмини камайтиришга қаратилган ҳаракатлар режасини тақдим этди. Бу ҳақда 2 октябрь куни БМТ бош котиби Пан Ги Мун маъмурияти маълум қилди.

Жаҳон ташкилоти раҳбари маъмурияти охирги муддат ҳисобланган 1 октябрь санаси тугашидан аввалроқ Иқлим ўзгариши бўйича БМТ Доиравий Конвенцияси котибиятига миллий режаларнинг киритилганини маълум қилиб, буни йил охирида Париж шаҳрида имзоланиши режалаштирилган иқлим бўйича янги шартнома устида ишлашдаги биринчи ижобий қадам деб баҳолади. Пан Ги Мун давлатларни мазкур ҳужжатга илмий тадқиқотлар натижаларига мос тарзда “уларни доимий равишда қайта кўриб чиқиб, иштиёқ ва миллий мажбуриятларини ошириб борувчи тартиб-қоидаларни киритишга чақирди.

БМТ бош котиби расмий номи “миллий даражадаги улушни белгилаш” (INDC) бўлган ўз миллий режаларини тақдим этишга улгурмаган бошқа мамлакатларни ҳам бу ишни Парижда ўтказилувчи конференция вақтига қадар тугаллашга чақирди. Бироқ улар Иқлим ўзгариши бўйича БМТ Доиравий Конвенциясининг 21 декабрда бўлиб ўтадиган форумда тақдим этиладиган жамловчи ҳисоботига бириктирилмайди.

Франция пойтахтида имзоланадиган иқлим бўйича янги шартнома 1997 йилда имзоланган Киото протоколи ўрнида қабул қилиниб, ривожланган ва иқтисодиёти ўтиш даврида бўлган давлатларга иссиқхона газларини ажратиб чиқаришни қисқартириш ёки меъёрлаштириш мажбуриятини юклайди. БМТ шафелиги остида кечувчи янги музокаравий жараённинг асосий мақсади саноатлаштириш давридан олдинги ҳолат билан солиштирилганда, Ердаги ҳаво ҳароратининг Цельсий бўйича 2 даражадан кўтарилмаслиги учун атмосферага зарарли газлар ажратишни камайтиришга эришишдан иборат. Акс ҳолда, олимларнинг огоҳлантиришича, дунё аҳли Ер экологияси учун тиклаб бўлмас даражадаги оқибатлар билан тўқнаш келиб, жамият ва иқтисодиёт ҳам катта зарар кўради.

147 давлат қаторида Бразилия, Германия, Ҳиндистон, АҚШ, Россия, Франция ва Европа Иттифоқи мамлакатлари ҳам ўз миллий режасини тақдим этди. Бироқ бир неча кун муқаддам Пан Ги Мун мамлакатлар эълон қилган режалар атмосфера ҳароратининг 2 даражадан оширмаслик учун етарли эмаслигини маълум қилиб, дунё давлатларини ўз олдига янада улканроқ мақсадларни қўйишга чақирди.