Лос-Анжелес суди британиялик актёр Гэри Олдманнинг ажрашиш бўйича аризасини ижобий қондирди. Бу ҳақда бугун Ассошейтед Пресс хабар берган.

Суд қарорига кўра, Гэри Олдман эндиликда ўзининг собиқ рафиқаси Александра Эденборога 3,3 млн доллар тўлайди. Актёр 2та уй ва машиналарга эгалик ҳуқуқини ўзида сақлаб қолади.

Ушбу жуфтлик 5 йиллик турмушдан кейин, 2015 йилнинг январида ажрашиш учун ариза беришганди.

Қайд этиш керакки, Эденборо Олдманнинг тўртинчи рафиқаси эди. Британиялик актёр бундан аввал яна икки актриса Лесли Мэнвилл ва Ума Турманга уйланганди. Унинг учинчи турмуши эса фотограф Донье Фиорентино билан қурилган лекин улар 2001 йилда ажрашишганди.

Маълумот учун Гэри Олдман 1958 йилда Лондон шаҳрида туғилган. У ўнлаб картиналарда муваффақиятли роллар ижро этган, шулардан энг кўп машҳурликка эришганлари Кристофер Нолан режиссёрлигидаги Бэтмен ҳақидаги трилогиялар ҳисобланади.

2012 йилда ушбу Олдман "Эй жосус, буёққа чиқ" номли фильмдаги иштироки учун "Энг яхши эркак актёр" номинацияси бўйича мукофотланганди.