Мексиканинг Тамаулипас штати полицияси бир неча кун давомида жиноятчилар томонидан ушлаб турилган 44 нафар хорижлик муҳожирни озод қилди. 1 октябрь куни хабар берилишича, минтақадаги ҳуқуқни муҳофаза қилиш органлари ҳаракатларини мувофиқлаштирувчи гуруҳ АҚШ билан чегарадош Рейнос муниципалитетида махсус амалиёт ўтказди.

“Полиция маҳаллий аҳолидан қуролли жиноятчилар неча ўн муҳожирни ушлаб тургани ҳақида маълумот олди”, - дейилади хабарда. – Ўтказилган махсус амалиёт натижасида турли мамлакатлар фуқароси ҳисобланган 18 эркак, 10 аёл ва 16 бола озод қилинди”. Жиноятчилар яширинишга улгурган бўлиб, айни пайтда уларни қидириш ишлари олиб борилмоқда.

Маълум бўлишича, озод қилинганларнинг 35 нафари Сальвадор, 6 нафари Гватемала, 2 нафари Гондурас ва бири Никарагуа фуқароларидир. Хорижликларнинг айтишича, бир неча кун давомида уларга егулик берилмаган. Барча қутқарилганларга тез тиббий ёрдам кўрсатилиб, сўнгра миграция хизмати ходимлари қўлига топширилган.

Мексикалик жиноий гуруҳлар кўп йиллардан буён “жонли товар”ларни АҚШга ноқонуний элтиш билан шуғулланиб, мўмай даромад кўрмоқда. Улар Марказий Америка давлатлари фуқароларини маълум маблағ эвазига Америкага етказиб қўяди.