Бугунги кунда барча мактаблар қошида хусусий корхоналар томонидан озиқ-овқат маҳсулотлари билан таъминланадиган ошхоналар мавжудлигига қарамай, ўқувчилар ташқарида сотиладиган енгил таомлар билан тамадди қилишни маъқул кўрмоқда.

Бундай маҳсулотларнинг ҳар доим ҳам сифат талабларига жавоб бера олмаслиги эса эътибордан четда қолмоқда. Бу масалани ойдинлаштириш учун Anhor.uz сайти ўз суриштирувини ўтказди.
Аввало, кўчада савдо қилувчи аёллар солиқ тўламасликлари боис арзонроққа савдо қилиши, қарзга маҳсулот бериши болаларнинг диққатини тортмоқда.

Аёллар, ўз навбатида, мухбирлар билан суҳбатда иш топа олмаганликлари учун бундай иш билан шуғулланишларини маълум қилдилар.
Таъкидланишича, улар сотаётган маҳсулотлар санитария-гигиена талабларига мутлақо жавоб бермайди. Уларга қарши бир қанча рейдлар уюштирилганига қарамай, ҳозирча кўпгина мактабларда вазиятни ўнглаш имкони бўлмаяпти.