Американинг Орегон штатидаги Умпква коллежи ҳудудидаги отишмани 26 ёшли Крис Харпер Мерсер исмли шахс содир этган. Бу ҳақда 1 октябрь куни Американинг CBS телеканали ҳуқуқни муҳофаза қилиш органларидаги ахборот манбасига асосланиб хабар берди. Аммо бу ҳақдаги расмий хабар ҳозирча ошкор қилингани йўқ.
Шериф Жон Хэнлиннинг маълум қилишича, коллеждаги отишма оқибатида 10 киши, жумладан, жиноятчининг ўзи ҳам ҳалок бўлган. Етти киши эса турли даражада жароҳат олган. Уч нафарининг аҳволи жиддий экани хабар қилинди.
Бундан аввалроқ эса ОАВ отишма қурбонлари 15 киши бўлиб, жароҳатланганлар 20 нафарни ташкил этишини маълум қилган эди.
Жон Хэнлиннинг ойдинлик киритишича, қуролли ҳужумни уюштирган эркак бу ерга етиб келган полиция билан отишмада отиб ўлдирилган. Бунда ҳуқуқ ҳимоячиларидан ҳеч ким жабр кўрмаган.
Жиноятчи коллеж ҳудудига ўзи билан уч тўппонча ва милтиқ олиб кирган. Ушбу қуролларнинг барчаси ҳодиса жойидан топилган. У барча қуроллардан фойдаланишга улгурдими-йўқ, ҳозирча аниқланмади.