АҚШнинг Орегон штатидаги Ампкуа коллежида отишма содир этган Крис Харпер Мерсер фақатгина христиан динига мансуб кишиларни ўлдиришни мақсад қилиб олган. Бу ҳақда гувоҳлар сўзларига асосланиб CNN телеканали хабар қилди.

Ҳодиса гувоҳлари ва уларнинг қариндошлари сўзларига кўра, қуролланган жиноятчи аудиторияга кириб, қурол ўқталган ҳолда ўқувчилардан қайси динга эътиқод қилишини сўрай бошлаган. Гувоҳларнинг айримлари қотил насроний динига эътиқод қилишини айтган кишиларни жойида отиб ташлаганини билдирган.

Шериф Жон Хэнлиннинг маълум қилишича, коллеждаги отишма оқибатида 10 киши, жумладан, жиноятчининг ўзи ҳам ҳалок бўлган. Отишмадан етти киши жароҳат олган бўлиб, уч нафарининг аҳволи оғир.

Мазкур ҳодисага муносабат билдирган АҚШ президенти Барак Обама мамлакатнинг қуролга оид қонунчилигини зудлик билан ўзгартириш лозимлигини айтиб ўтди. Унинг сўзларига кўра, қотиллик қайсидир маънода мутаассибликка айланган ва унга барҳам бериш вақти келди.