Қорақалпоғистон Республикасида қутурган итлардан 3.2 минг киши жабр кўрди. Бу ҳақда Ўзбекистон ФВВ матбуот хизмати хабар бермоқда.
Ҳисоботда айтилишича, Қорақалпоғистоннинг кўпгина маҳалла ва аҳолижойларида ўтказилган рейдалрда 60 732 дайди ит ва 26 956 дайди мушук аниқланган. Шунингдек, 1 142 жойда тушунтириш ишлари ўтказилган.
Ветеринария хизмати томонидан 13 159 ит қутуришга қарши эмланган. Йил бошидан буён 3 768 ит, 252 мушук ва 48 бошқа турдаги дайди жониворлар тутилган. Қорақалпоғистон тиббиёт уюшмаси қутурган итлар томонидан тишланган 3 246 кишини эмлаган.
Ўтган 8 ой мобайнида жониворларга қараш қоидалари бузилиши ҳолатлари 459 марта қайд қилинган, 189 ҳолатда жавобгарлар жаримага тортилган. Жарималарнинг умумий миқдори 6 018 423 сўмни ташкил қилган.