АҚШнинг Айредел шаҳрида (Шимолий Каролина штати) мактаблараро мусиқа фестивалида темир-бетон соябон қулаб тушди, деб хабар бермоқда Reuters ахборот агентлиги. Оқибатда 25 киши жароҳат олган.

Воқеа 3 октябрда маҳаллий вақт билан соат 14:15 да (Тошкент вақти билан 23:15 да) юз берган. CBS News телеканалининг маълум қилишича, соябон унинг устунларидан бирига юк машинаси келиб урилгандан кейин қулаб тушган. Фалокат пайтида соябон остида  фестиваль иштирокчилари бўлган.

Воқеа жойига ҳуқуқ-тартибот муассасалари ходимлари ва тез тиббий ёрдам бригадалари етиб келган. Жароҳатланганлар шифохонага етказилган, улардан бирининг аҳволи жуда оғирлиги айтилмоқда.

Қайд этилишича, тадбирда 30 та мактабдан мусиқа жамоалари иштирок этиши керак бўлган, бироқ бир нечта гуруҳ ёмғирли об-ҳаво туфайли унда иштирок этишдан воз кечган. Фожиа туфайли фестиваль бекор қилинди.