Дунёда ўта камбағаллик даражаси жорий 2015 йилда илк маротаба сайёрамиз аҳлисининг 10 фоизидан камроғини ташкил этади, дея хабар бермоқда Франс Пресс ахборот агентлиги Жаҳон банки ҳисоботига таянган ҳолда.

“Бугунги кунда дунёдаги энг яхши хабар бу. Мазкур башоратлар бизнинг инсоният тарихида камбағалликнинг ўта оғир даражасига барҳам бериш мумкин бўлган биринчи авлодга айлана олишимизни кўрсатмоқда”, - деди банк президенти Жим Ен Ким.

Жаҳон банки прогнозларига кўра, бу йилда тахминан 702 миллион киши ёки дунё аҳолисининг 9,6 фоизи ўта қашшоқ ҳолда турмуш кечирмоқда. Уларнинг аксарияти – Осиё ва Африканинг Саҳрои Кабир жанубидаги ҳудудларида истиқомат қилади. 2012 йилда улар сони 902 млн ёки сайёрамиз фуқароларининг 13 фоизини ташкил этган бўлса, 1999 йилда бу кўрсаткич 29 фоизга тенг бўлган.

Президент сўзларига кўра, камбағалликнинг оғир даражаси пасайишига иқтисоди ривожланаётган мамлакатлардаги ўсиш кўрсаткичлари ҳамда соғлиқни сақлаш ва таълим соҳасига ажратилаётган инвестициялар катта таъсир кўрсатди. Шу билан бирга, ижтимоий хавфсизлик тизими фаолияти ҳам мазкур натижаларга эришишга хизмат қилди.

Маълумот ўрнида, авваллари кунлик харажати 1,25 долларгача бўлган аҳоли қатлами ўта камбағал ҳисобланар эди. Бугунги кунда эса инфляция ҳисобига мазкур маблағ кунига 1,9 долларни ташкил этмоқда.