Ўтган ҳафтада Бельгия ҳукуматидан асосан Афғонистон, Сурия ва Ироқ фуқаролари бўлган 1,3 минг нафардан зиёд қочқин бошпана сўради. Мазкур кўрсаткич аввалги ҳафтага нисбатан 10,66 фоиз кўп деганидир. Бу ҳақда Бошпана ва миграция масалалари идораси хабар қилди.

Ўз навбатида, ироқлик бошпана сўровчилар сони камайгани қайд этилди. Аввалроқ эса Бельгия иммигацион ҳукумати Facebook орқали қироллик ҳудудидаги Ироқ фуқароларига қочқин мақоми берилмаслиги ва уларга яшаш ҳуқуқи тақдим этилмаслигини маълум қилган эди.

Бельгия ҳукумати ироқликларни қочқин эмас, балки иқтисодий муҳожирлар сифатида кўрмоқда. Бошпана ва миграция масалалари бўйича Бельгия давлат котиби Тео Франкеннинг сўзларига қараганда, Бельгия ҳудудига кириб келган қочқинларнинг аксарият қисми ироқлик, янада аниқроқ айтганда, Бағдод шаҳридан.

Уларнинг кўпчилиги 25-45 ёшдаги эркаклар бўлиб, Сурия фуқароларидан фарқли равишда, мамлакатга ёлғиз, турмуш ўртоқлар ва фарзандларсиз келишган.
Расмий маълумотларга қараганда, август ойида Бельгияга қадар етиб келган 5,6 минг қочқиннинг 47 фоизи ироқликлар ҳисобланади.