Гватемалада 4 октябрга ўтар кечаси юз берган ер кўчкиси туфайли ҳалок бўлганлар сони 131 нафарни ташкил этмоқда.

Бундан олдин мамлакатнинг Санта-Катарина-Пинула муниципалитетида содир бўлган ва мамлакат тарихидаги энг фожиали ҳодиса деб эътироф этилаётган кўчки оқибатида ҳалок бўлганлар сони 102 нафарга етгани хабар қилинганди.

Қутқарувчилар тупроқ остида қолганлар орасидан тирик қолганлар топилишига умид йўқлигини айтишган.

Шунга қарамасдан ҳодиса содир бўлганидан 72 соат вақт ўтганича қидириш ишлари олиб борилади.

Ушбу фалокат туфайли 125та уй қалин тупроқ остида қолган.