"Ростуризм" раҳбари ўринбосари Сергей Корнеевнинг фикрича, Ўзбекистон россиялик дам олувчиларни визасиз тартиб, юқори даражадаги хавфсизлик, анъанавий меҳмондўстлик ва валюталар билан айирбошлаш ҳақидаги келишув билан ўзига тортади. 

Ўзбекистон ва Россия икки томонлама сайёҳликни ривожлантириш соҳасида катта салоҳиятга эга, деб айтмоқда Россия сайёҳлик федерал агентлиги ("Ростуризм") раҳбари ўринбосари Сергей Корнеев.

Шу кунларда Тошкентда Сергей Корнеев бошчилигидаги Россия сайёҳлик компаниялари делегацияси ташриф билан бўлмоқда. Корнеев сайёҳлик соҳасида Ўзбекистон-Россия ўзаро муносабатларининг истиқболлари ҳақидаги фикри билан бўлишди.

"Биз Россия ва Ўзбекистон ўртасида сайёҳликни ривожлантиришнинг катта салоҳиятларни кўрмоқдамиз. Буюк тарих, Самарқанд, Хива, Бухоро, Хоразм каби бутун дунёга машҳур тарихий брендлар – буларнинг барчаси россиялик сайёҳлар учун таниш, уларнинг дидларига мос келади", деб таъкидламоқда Корнеев.

"Биз Ўзбекистонга жиддий режа ва умидлар, катта қизиқиш билан келдик. Боз устига, бизда ишлашимиз керак бўлган умумий мавзу бор – бу Буюк ипак йўли брендини олға суришдир", деб ўз сўзини давом эттиради Корнеев.

"Ростуризм" раҳбари ўринбосарининг айтишича, бу буюк ва қудратли бренд Россия каби Ўзбекистонга ҳам катта сайёҳлик оқимини жалб қилишга қодир ва давлатлар Бутунжаҳон сайёҳлик ташкилотининг бу брендни олға суришдаги саъй-ҳаракатларини қўллаб-қувватлашлари лозим.

Корнеевнинг айтишича, россияликлар аввалдан бу тарихий жойларга катта қизиқиш билдирганлар. Бунда сайёҳлик нуқтаи назаридан рус ва ўзбек халқи ўртасида тил борасида тўсиқнинг йўқлиги ва анъанавий шарқона ранг-баранглик муҳим роль ўйнайди.