АҚШ бошчилигидаги халқаро коалиция Сурия ҳудудида ИШИДга қарши курашни фаоллаштиришни кўзламоқда. Бу ҳақда New York Times Пентагон ва Оқ уйдаги ахборот манбаларига асосланиб хабар бермоқда.

ИШИДнинг норасмий пойтахти саналувчи Раккага босимни кучайтириш мақсадида Сурия шимоли-шарқида янги фронтни очиш Вашингтон режасидан ўрин эгаллаган. Нашр маълумотига кўра, АҚШ президенти Барак Обама ҳужумкор операцияларни тезлаштиришга қаратилган икки қадамни ташлашга рухсат берди.

Жумладан, у илк марта қуролланган Сурия муҳолифатига тўғридан-тўғри бир қатор ҳарбий аслаҳаларни етказишга қарор қилди. Шунингдек, Барак Обама жангарилар позицияларига авиазарбалар бериш жадаллигини кенгайтириш ғоясини қўллаб-қувватлади.

Мазкур чоралар 3-5 минг муҳолифат жангчиларининг 20 минг нафарлик курд жангарилари билан бирга коалиция авиацияси кўмагида Раккага ҳужум амалиётини ўтказиш мақсадида кўрилмоқда. Вашингтон фикрича, операция ИШИД гуруҳи таъминот олаётган Туркия-Сурия чегараси устидан назорат ўрнатишга ҳам хизмат қилади.