4 октябрь куни Португалияда парламентга сайловлар бўлиб ўтди. Сайлов участкалари эрталаб соат 8.00да очилган, овоз бериш кечки соат 19.00га қадар давом этган.

Бугун Португалия ўнг марказчилари коалицияси (Социал-демократик партия - СДП) ғалабани нишонлашди. Бу коалиция сайловчиларнинг 37 фоизи ишончига сазовор бўлган.

Таҳлилчиларнинг фикрига кўра, энди бу коалиция мамлакатда кескин иқтисодий ислоҳотлар ўтказади ва солиқларни оширади.

Бу коалицияга сайлов пайтида асосий рақиб бўлган Антониу Кошта раҳбарлигидаги Социалистик партия (СП) 32 фоиз овоз олган. Мухолифатдаги бу партия раҳбари коалиция раҳбари ва амалдаги бош вазир Педру Пассуш Коэльюни ғалаба билан табриклади.

Коэлью ислоҳотлар масаласида бошқа партиялар билан ҳамкорлик қилишини билдирган.

Маълум қилинишича, кейинги 2,5 йил давомида Португалияда ишсизлик кўрсаткичлари ёмонлашган. Таҳлилчилар мамлакатнинг иқтисодий аҳволи яқин вақт ичида тикланиши даргумонлиги ҳақида фикрлар билдиришмоқда.

Шунга қарамасдан, айни вақтда иқтисодий кўрсаткичлар нисбатан ўса бошлаган.

Сайловларда 13та сиёсий партия ҳамда 3та коалиция иштирок этган.

Маълумот учун, Португалияда овоз бериш ҳуқуқига 9,6 млн фуқаро эга.

Португалия фуқаролари 230 ўринли бир палатали парламентга - Республика йиғинига депутатларни 4 йил муддатга сайлайди.