Бельгия байроғи остида сузган юк кемаси 6 октябрга ўтар кечаси Шимолий денгиздаги Бельгиянинг Зебрюгге тумани ҳудудида суюқлик ташувчи танкер билан тўқнашиши натижасида чўкиб кетди. Мазкур кема бортидаги 12 нафар экипаж аъзоларининг барчаси қутқариб олинди, дея маълумот берди Ғарбий Фландрия провинцияси губернатори Кар Декалюве.

Кеманинг қандай юк ташигани, танкерга қай даражада шикаст етгани ва тўқнашув натижасида кимнингдир жароҳат олгани тўғрисида хабар қилингани йўқ.

Декалюве сўзларига кўра, мутахассислар денгиз транспорти воситалари тўқнашувидан атроф-муҳитга етказилган зарар миқдорини аниқлашга киришишган. Авария содир бўлган ҳудудда Бельгия ва Нидерландия қутқарув хизматлари иш олиб бормоқда.