Промоутер Тимур Дугазаев WBA таснифи бўйича ўта оғир вазнда мунтазам чемпион Руслан Чагаев (Ўзбекистон, 34-2-1, 21 та нокаут) ва Фрес Окендо (Пуэрто-Рико, 37-8, 24 та нокаут) ўртасидаги реванш жанг бекор қилинганини маълум қилди.

"17 октябрда Германиянинг Кил шаҳрида бўлиши керак бўлган жанг пуэрториколик боксчи елкасидан жароҳат олгани туфайли бекор қилинди", деб айтмоқда Чагаевнинг промоутери.

Дугазаевнинг айтишича, Чагаев 17 октябрда рингга чиқмайди, чунки икки ҳафта ичида унга барча жиҳатлар бўйича мос келадиган рақибни топиш жуда мураккабдир.

"Русланнинг кейинги тақдирини WBA ҳал қилади, чунки айнан у жангни белгилаган. Чагаевнинг чемпионлик камари учун мажбурий рақиби Лукас Браун ҳисобланади", деб таъкидламоқда Дугазаев.

Аввалроқ, ўтган йилнинг июлида Чагаев Грознийда бўлиб ўтган Окендога қарши жангда очколар (115:113, 115:113, 114:114.) бўйича ғолиб бўлганди.