Яқинда Ғарб “Сурия мўътадил мухолифати” лойиҳасининг муваффақиятсизликка учраганини тан олди. Эндиликда эса у Россияни айнан ўша кучларга зарба беришда айбламоқда, деб ёзади The Independent нашри.

“Хабар қилишларича, Россия “мўътадил мухолифат”ни ўққа тутмоқда, бундай куч эса, АҚШнинг тан олиши, аллақачонлардан буён йўқ”, - дейилади материалда.
Таъкидланишича, бу кучлар Сурия озод армиясига қочиб ўтган ҳарбийлардан иборат эди, Ғарб давлатлари эса бу кучни Асаднинг муқобили сифатида кўраётган эди.

Аммо бу армия аллақачоноқ парчаланиб кетди, қуролли гуруҳларнинг катта қисми ИШИД ва “Жабҳат ан-Нусра” таркибига қўшилди. Вашингтоннинг мўътадил кучларга ҳарбийлар тайёрлаб бериш дастури ҳам иш бермади: 70 нафар тайёрланган жангчилар “ан-Нусра” томонидан тор-мор қилинди.

Шундан сўнг МРБнинг собиқ раҳбари Дэвид Петреус мўътадил мухолифат инқирозини эътироф этди. Аммо Россия Сурияга кириб келиши билан бутун Ғарб яна мўътадил мухолифатни эсга олди.
“Ваҳоланки бир неча ҳафтагина муқаддам Ғарб бу кучлардан воз кечган эди”, - дейилади мақолада.