Россиянинг Москва вилоятидаги Воскресенский туманида Москва шаҳрида жойлашган Қозон вокзалида граната портлатиш билан таҳдид қилган маст ўзбекистонлик қўлга олинди. Ҳуқуқни муҳофаза қилиш органларининг “360 Подмосковье” телеканалига хабар қилишича, қўлга олинган шахс яшаган квартира тинтув қилинганда, портловчи ускуна топилмади.

4 октябрь куни 21:45 да 44 ёшли Ўзбекистон фуқароси полицияга мурожаат қилиб, 37 ёшли ҳамюрти вокзалда граната портлатиш билан таҳдид қилгани тўғрисида хабар берган. Кейинчалик ойдинлик киритилдики, тумандаги турар жой биноларидан бирида биргаликда алкогол ичиш вақтида ушбу таҳдид тилга олинган.
Мазкур иш юзасидан текширув ишлари олиб борилмоқда.