Бугунги кунда кактус турларининг қарийб учдан бир қисми йўқолиб кетиш арафасида. Тиканакли ўсимликлар сайёрадаги энг нозик ўсимликлар рўйхатидан ўрин эгаллади, дея хабар бермоқда Reuters агентлиги 6 октябрь куни.
“Биз кактус турларининг катта қисми турли хил таҳдидлар туфайли буткул йўқолиб кетиш арафасида эканини аниқлаб, ҳайратга тушдик”, - дейди тадқиқот гуруҳи раҳбари Барбара Готч.

Олимлар фанга маълум бўлган 1478та кактус турининг 31 фоизи йўқолиш чегарасида, деган хулосага келишди. Мазкур ўсимликларнинг сайёрамиз сатҳидан ғойиб бўлиш суъатлари сутэмизувчилар ва қушларга қараганда тезроқ кечмоқда.
Тиканаклар учун энг хавфли омил сифатида инсонлар фаолияти тилга олинди. Масалан, йўқолиб кетиш арафасида турган ноёб ўсимликлар савдоси билан ноқонуний шуғулланиш, кактуслар ўсадиган ҳудудларда жониворларнинг боқилиши уларга катта таҳдид туғдирмоқда.

Бир сантиметрдан 19 метргача бўлган кактуслар коллекционерлар ўртасида қадрланади: ўсимликлар турли ранг ва кутилмас қиёфадаги гуллари билан кишиларни ҳайратга солади. Йўқолиб кетиш хавфи остида турган кактуслар асосан Шимолий ва Жанубий Америкадаги Чили, Уругвай, Мексика ва Қўшма Штатлар ҳудудларида ўсади.