Навоий вилоятининг Конимех туманида одамларни алдаб пул ундириб келган фирибгар аёл қўлга олинди. Бу ҳақда “Постда” нашри хабар бермоқда.
Айтилишича, Таслима исмли аёл бир неча йилдан буён ўзини турли давлат корхоналари амалдори сифатида таништириб, ушбу корхоналарга иши тушган одамларга ёрдам бериш баҳонасида улардан пул ундириб келган.

Бир сафар у “Қизилқумцемент” корхонасига куёвини ишга жойлаштириш масаласида келган эркак билан танишиб қолиб, шу корхонада ишлашини айтган ҳамда ишни “битириб бериш” учун содда эркакдан маълум миқдорда тўлов талаб қилган.
Уч кундан сўнг эркак Таслимага сўралган пулларни олиб келиб берган. Шу билан аёл ғойиб бўлган.

Алданганини тушунган эркак милицияга мурожаат қилган. Ўтказилган текширувлар асносида қаллоб фош қилинган. Тергов давомида у кўпдан буён бундай фаолият билан шуғулланиб келгани аниқланган.