Қозоғистоннинг Олма-Ота вилояти Қорасарой туман суди икки маҳаллий фуқарони Суриядаги ҳарбий ҳаракатларда қатнашгани ва Қозоғистонда радикал ғояларни тарғиб этгани учун қамоқ жазосига ҳукм қилди, дея хабар бермоқда “Интерфакс”.

Уларга нисбатан мол-мулки мусодара қилинган ҳолда олти йилдан жазони ижро этиш колониясида умумий тартибда озодликдан маҳрум қилиш жазоси тайинланди.

Тергов маълумотларига биноан, 42 ёшли эркак 2013 йилнинг декабрида ноқонуний равишда Туркия-Сурия чегарасини кесиб ўтиб, халқаро “Ал-Қоида” террорчилик гуруҳи таркибидаги “Жамаат Абу Убайда” гуруҳига қўшилган. Бундан аввалроқ эса ушбу гуруҳга унинг акаси аъзо бўлган.

Хабар қилинишича, улар Суриянинг Алеппо шаҳридаги қамоқхонани эгаллаш учун олиб борилган жанг ҳаракатларида иштирок этган.