Макка яқинидаги Мино водийсида тиқилинчда ҳалок бўлган ҳиндистонликлар сони 74 нафарга етди, дея хабар берди Ҳиндистон Ташқи ишлар вазири Сушма Свараж 6 октябрь куни.

“Саудия Арабистони янги рўйхатни тақдим этди. Ҳозирда ҳалок бўлган ҳиндистонликлар 74 нафарни ташкил этади”, - дея маълум қилди вазир ўзининг Twitter микроблогида.
Эслатиб ўтамиз, фожеа 24 сентябрь куни эрта тонгда Макка яқинидаги Мино водийсида содир бўлди.

Иккита улкан одамлар оқими чодирлар шаҳарчасидан шайтонга тош отиш амали бажариладиган ҳудудга элтадиган йўлдаги чорраҳада тўқнаш келиб қолган. Кўчалар кесишмасида улкан тиқилинч вужудга келиб, натижада 769 киши ҳалок бўлди, энг камида 934 зиёратчи жароҳатланди.