БМТ бутунжаҳон туризм ташкилоти Ўзбекистонга ташриф буюрган туристларнинг таассуротларига асосланган ҳисобот тайёрлади.
Унда келтирилишича, Ўзбекистонга энг кўп сайёҳлар Россия, Туркия, Ҳиндистон, Германия ва Жанубий Кореядан келади.

Айнан шу давлатлар Ўзбекистоннинг энг яқин савдо ва иқтисодий ҳамкорлари ҳисобланади. Сайёҳларнинг ўртача ёши 50да. Уларнинг асосий қисми олий маълумотга эга бўлиб, туристик пакетлар воситасида саёҳат қилади.
Респондентларнинг 77 фоизи Ўзбекистонга ЮНЕСКО рўйхатига киритилган тарихий ёдгорликларни кўриш учун келганликларини таъкидладилар.

Бошқа бир гуруҳ сайёҳлар эса Ипак йўли брендига қизиқиши уларни бу минтақага ундаганини таъкидлаб ўтдилар. Сайёҳлар Ўзбекистонда ўртача 10 кун бўлишади, бу давр ичида кўпчилик Самарқанд, Бухоро ва Тошкентда бўлиб улгуради. Хива, Термиз ва Фарғона водийсига ташриф буюрувчилар миқдори ҳозирча камроқ.

Шунингдек, туристларнинг 72 фоизи бу ердаги нархларнинг қониқарли эканлигини таъкидлаб ўтишди. 83 фоизи эса Ўзбекистонни туристлар учун хавфсиз мамлакат деб баҳолади. Ўзбекистонга йўналтирилган энг қулай рейсларни Uzbekistan Airways (56 фоиз), Turkish Airlines (14 фоиз) ва Аэрофлот (9 фоиз) компаниялари тақдим этиб келмоқда.