Браконьерлар сўнгги икки ҳафтада Зимбабвенинг турли қисмларидаги миллий боғларда 14та филни цианид моддаси ёрдамида заҳарлашди, дея хабар бермоқда Guardian.

Олтита филнинг тишлари кесиб олинган, дея маълум қилди маҳаллий миллий боғлар бошқармаси вакиллари, айни пайтда жиноятчилар қидирилмоқда.
Қайд этилишича, браконьерлар жониворларга цианид билан зарарланган апелсинларни беришган, шунингдек, улар жониворлар минерал моддалар билан тўйинадиган шўрхок ерларни ҳам заҳарлашган.

Икки йил муқаддам ҳам браконьерлар шўрхок ерларни заҳарлаш орқали юзлаб филларни ўлдиришган эди. Ўшанда фил жасадлари билан озиқланган қузғунлар ҳам нобуд бўлганди.
Айни пайтда Африка мамлакатларидаги миллий боғларда йирик сутэмизувчилар популяцияси 100 мингга яқинни ташкил этмоқда.