«Эвиан» жамоаси ҳимоячиси Гаэль Живе жамоани қандай сабабларга кўра тарк этгани ҳақида маълум қилди.

У жамоадагилар ўзини узун соқоллари учун жиҳодчига ўхшатишгани туфайли шарномасини бекор қилган.

"Паскаль Дюпра ва жамоа президенти менга бошқа йўл қолдиришмади. Жамоанинг асосий таркибида ўтказган илк ўйинимдан 3 кун ўтиб, улар мени офисга чақиришди ва куракда турмайдиган талаб қўйишди. Уларнинг бу талаби умуман футболга алоқадор эмасди.

Гап шундаки, менинг узун соқолим муаммо сабаби бўлди. Улар дарҳол соқолимни олиб ташлашни сўрашди. Лекин мен 33 ёшдаман ва бундай кўрсатмани бажаришни ўзимга эп кўрмайман.

Уларнинг наздида узун соқол ИШИД жиҳодчиси эканингни билдиради.

Лекин мен ҳатто мусулмон эмасман ва жиҳодчилик нималигини билмайман ҳам. Бу ақлга сиғмас иш бўлди.

Албатта, Паскаль Дюпра менинг жамоани тарк этишимни истмамаган, лекин у соқолимни олиб ташлашимни истаганди.

Унга бундай қилмаслигимни айтдим. Бу талабни бажариш ўта кулгили бўларди. Мен жамоа билан шартномани бекор қилишга қарор қилдим", дейди Живе.