Россияда соатига 800 километр тезликда ҳаракатланувчи учувчисиз разведка самолёти ишлаб чиқарилади. Бу ҳақда ТАССга Россия мудофаа-саноат комплексидаги ахборот манбаси маълум қилди.

“Ҳозирда биз соатида 800 километргача тезликда ҳаракатлана оладиган учувчисиз разведка самолётини яратиш устида иш олиб бораяпмиз”, - деди агентлик суҳбатдоши.
Унинг сўзларига кўра, жанг майдонидаги бошқа аппаратлардан фарқли равишда, мазкур учувчисиз самолётни ўқотар қуроллар ва ўрта калибрли аслаҳалар билан уриб тушириш қийин.

“Барча мавжуд учувчисиз самолётлар паст тезликда ҳаракатлангани сабабли уларни ҳаттоки ўқотар қуроллар билан ҳам уриб тушириш мумкин, мазкур аппарат эса биринчи навбатда тезлиги сабабли бу каби қуроллар нишонига айланмайди”, - дея ойдинлик киритди манба.

Ушбу самолёт катапульта орқали учирилиб, ерга қўниши олдиндан белгиланган дастур асосида амалга оширилади.
Агентлик суҳбатдошининг қайд этишича, ишланма “тайёргарликнинг юқори босқичига келган”.