Технологик янги ишланмалар презентацияси жараёнида Microsoft компанияси ўзининг илк ноутбуги — Surface Book`ни намойиш қилди.

Ишлаб чиқарувчиларнинг ишонч билдиришича, янги ноутбук Apple`нинг MacBook Pro`сига қараганда икки баробар тезроқ ишлайди. Surface Book ҳажми 3000x2000 пиксел, зичлиги 267 ppi бўлган 13,5 дюмли (1 дюм – 2,54 см) сенсорли экран билан таъминланган. Дисплейга Corning Gorilla Glass 4 ҳимоя ойнаси ҳам ўрнатилган. Ёзиш учун эса Surface Pen стилуси (метал ёки пластик ручка)дан фойдаланиш мумкин. Шунингдек, ноутбук янгиланган Intel процессорлари ва NVIDIA GeForce видеокартаси билан таъминланган.

Компания янги маҳсулотини ноутбук дея намойиш этганига қарамасдан, ундан планшет ўрнида фойдаланса ҳам бўлади: унинг клавиатуралари алоҳида олинади. Ишлаб чиқарувчилар ноутбуклар 12 соатгача қувват қилинмасдан ишлаши мумкинлигини айтишди.

Ноутбукларга олдиндан буюртма бериш 7 октябрдан бошланиб, унинг бошлағич баҳоси 1499 долларни ташкил этади.

Microsoft презентация жараёнида Lumia 950 смартфонининг янгиланган намунаси — Lumia 950 XL`ни ҳам намойиш этди.