Жорий йилги ҳаж маросимларини адо этиш учун Саудия Арабистонидаги Макка ва Мадина шаҳарларига Россиядан белгиланган 16,4 минг киши ўрнига 13,2 минг киши борди. Бу эса илк марта белгиланган квоталарнинг тўлдирилмаслиги бўлди. Бу ҳақда Москвадаги матбуот анжумани вақтида Россия мусулмонлар диний бошқармаси вакили Али Хасанов маълум қилган.

"Бу йилда 13,2 минг нафар россиялик ҳажга борди. Кўрсаткичларнинг пасайиши доллар курси билан боғлиқ бўлди, сафар харажатлари қимматлашди. Натижада ҳажга боришни истаганларнинг барчаси ҳам бунга эриша олмади", дейди Али Хасанов.

У Чеченистон ва Ингушетия ҳудудидан квотада кўрсатилганларнинг барчаси ҳажга борганини таъкидлаган. Шунингдек, бу йилда Қримдан ҳажга борувчилар сони 2 баробар ортган.

"Бу борадаги якуний кўрсаткичлар 10 октябрь куни, барча зиёратчилар ватанга қайтиб келганидан кейин маълум бўлади", дейди у.

Маълум қилинишича, Россияда ҳажга бориш харажатлари 1 киши учун 2,9 минг доллардан 8,5 минг долларгача бўлган.